LANAO DEL SUR, Philippines — Napaslang ang isang pinaghihinalaang notoryus na miyembro ng Dawlah Islamiyah terrorist matapos na makasagupa ang tropa ng militar sbulubunduking bahagi sa hangganan ng Balindong at Piagapo, Lanao del Sur kamakalawa ng hapon.
Kinilala ni Lt. Col. Rafman Altre, commander ng 82nd Infantry Battalion (IB) ng Philippine Army ang napatay na si Jarir Usman, 28-anyos ng Brgy. Raya Saduc, Marawi City, Lanao del Sur.
Ang mga nasugatang kasamahan ng napatay na terorista ay mabilis na nagsitakas sa takot na makorner ng tropa ng pamahalaan.
Narekober sa encounter site ang isang M16 rifle, apat na improvised explosive device (IED), dalawang kilo ng sangkap pampasabog, isang magazine ng M16 rifle, isang cellphone, isang container ng bigas, mga personal na kagamitan at mga subersibong dokumento.
Kaugnay nito, hinikayat ni Col. Jose Maria Cuerpo II, commander ng 103rd IB ang publiko na ireport ang presensya ng mga terorista sakaling mapagawi ang mga ito sa kanilang komunidad.