Higit 7-libong katao inilikas sa Cagayan
TUGUEGARAO CITY, Cagayan , Philippines — Lumobo na sa mahigit 7,000 katao ang inilikas ng mga awtoridad kasunod ng malawakang pagbaha dulot ng walang humpay na pag-ulan dahil sa bagyong “Ramon” sa 19 munisipalidad dito sa lalawigan kahapon.
Sa tala ng Cagayan Disaster Risk Reduction Ma-nagement Office (CDRRMO), umabot na sa 7,332 katao mula sa 5,578 residente ang inilikas noong Martes mula sa mga bayan ng Sta. Ana, Gonzaga, Sta. Teresita, Camalaniugan, Aparri, Lallo, Claveria, Allacapan, Ballesteros, Sanchez Mira, Sta. Praxedes, Pamplona, Baggao, Gattaran, Buguey, Peñablanca, Lasam, Rizal at Solana.
Ayon sa CDRRMO, ang mga evacuees ay mula sa 2,824 bilang ng mga pamil-yang naapektuhan ng bagyo.
Bukod dito, dalawang transmission power lines ng National Grid Corporation of the Philippines (NGCP) sa Brgy. Magapit, Lal-lo ang naapektuhan ng pagbaha at nagdulot ng malawakang brownout sa mga naapektuhang bayan maliban sa Solano at Peñablanca.
Ayon sa NGCP, nadamay ding nawalan ng kuryente sa mga sakop na kalapit bayan ng Flora, Sta. Marcela, Luna at Pudtol sa Apayao.
Sinabi ni Cagayan Police Director Colonel Ariel Quilang na nilubog ng hanggang bewang na tubig baha ang mga barangay ng Tapel, Gonzaga at Visitacion, Marede, Casagan, Dungeg, Sta. Clara, Batu at Patungunan sa bayan ng Sta. Ana kung kaya’t naging pahirapan ang paghakot ng mga residente na lumilikas patungo sa evacuation centers.
Dahil sa taas ng tubig baha, sinuspinde kahapon ni Cagayan Governor Manuel Mamba ang klase sa lahat ng antas sa buong lalawigan habang idineklara rin ang parehong suspensiyon sa kalapit na Tabuk City, Kalinga at Paracelis, Mountain Province ng kani-kanilang LGU bunsod ng malalang pag-ulan, pagbaha at landslides.
- Latest
