Drug suspect dedo sa drug ops

LUCENA City, Philippines  —  Isang drug personality ang napaslang makaraang makipagbarilan diumano sa mga operatiba ng Lucena Police Drug Enforcement Unit habang isinasagawa ang anti-drug operation sa Purok Tulungan, Brgy. Ibabang Iyam, kahapon ng umaga.

Kinilala ni P/Lt. Col. Reydante Ariza, chief of police dito ang napaslang na si Roberto Gulifardo, 56, may asawa at kabilang sa Brgy. Drug Watchlist.

Alas-8:30 ng umaga nang kumasa umano ang suspek sa mga pulis nang mabilhan umano ng isang plastic sachet ng shabu.

Nang aarestuhin ay itinulak ng suspek ang poseur buyer na pulis saka pumasok sa kanyang bahay at kumuha ng kalibre 38 revolver at nagpaputok. Gayunman, napuruhan ang suspek nang gantihan ng mga operatiba.