Jailguard inatado sa lamay
LEGAZPI CITY, Albay , Philippines — Hindi na umabot nang buhay ang isang jailguard matapos pagtatagain ng kanyang nakaalitan habang nakikipaglamay sa Lascano Funeral Homes sa Brgy. Sta. Cruz, Bato, Camarines Sur kamakalawa ng gabi.
Agad nasawi dahil sa malalalim na sugat sa iba’t ibang bahagi ng katawan ang biktimang si Jail Officer Randy Ramos, residente ng nasabing barangay habang tinutugis ang suspek na si Roberto Regazpi, residente ng Brgy. Buluang.
Sa ulat, dakong alas-9:20 ng gabi habang nag-iinuman ang biktima at suspek sa lamay ng kanilang kakilala nang magkaroon ng mainitang pagtatalo at away. Tinangka pang awatin ng mga naglalamay at kainuman ang dalawa, pero biglang bumunot ng itak ang suspek at pinagtataga ang biktima na duguang humandusay. Agad tumakas ang suspek patungo sa ’di malamang direksyon. Sinubukan pang isugod sa Medical Mission Group Hospital sa bayan ng Nabua ang biktima pero idineklarang patay. Nakuha ng mga rumespondeng pulis ang itak na ginamit sa pananaga.
- Latest
