Monay (119)
KINABUKASAN, masayang bumalik sa Maynila sina Joem at Mam Cath.
Si Mark ang unang nakaalam ng relasyon nina Joem at Mam Cath. Niyaya ni Joem si Mark sa seafood restaurant na lagi nilang kinakainan ni Mam Cath. Paglabas nila ng opisina ay sa restoran na sila nagtuloy.
‘‘May sasabihin akong mahalaga, Mark. Ikaw pa lang ang unang makakaalam nito,’’ sabi ni Joem nang magkaharap na sila sa mesa. Inilalagay na ng waiter ang order nilang alimasag at hipon at mga sawsawan.
“Sabi ko na nga ba at mayroon kang sasabihin. Kinutuban na ako kanina nang magyaya ka. Hindi mo naman birthday. Ano ba ‘yun, Bro?’’
“Kumain muna tayo at baka magulat ka sa sasabihin ko e hindi ka na makakain.’’
“Sige. Nagugutom na nga ako. Mukhang marami akong makakain dahil ngayon lang ako nakakita ng sariwang hipon at alimasag. Mukhang sanay na sanay ka na rito, Bro.’’
“Oo. Dito ako kumakain lagi.’’
“Iba talaga kapag VP, sa masarap kumakain.’’
‘‘Dito kasi gusto ni Cath.’’
Napatigil sa pagbabalat ng hipon si Mark. Umarko ang kilay habang nakatingin kay Joem.
“Teka mukhang may kinalaman si Mam Cath sa ipagtatapat mo, Bro.’’
“Magaling ka talagang manghula, Mark.’’
“Anyare, Bro? Ipagtapat mo na.’’
“Nobya ko na si Cath. Balak ko na siyang pakasalan. Mahal na mahal ko.’’
Hindi na itinuloy ni Mark ang pagbabalat sa hipon dahil sa narinig. Nagulat siya pero saglit lang at saka biglang binati ang kaibigan.
“Congrats Bro. Sabi ko na nga ba. Noon pa may kutob na ako. Napakasuwerte mo talagang tao – walang kasingsuwerte!’’
“Salamat Mark. Ikaw ang bestman ko sa wedding namin.”
“Areglado, my friend.”
(Itutuloy)
- Latest