Higit 100 ‘di bakunadong commuters, pinababa sa PUVs
MANILA, Philippines — Mahigit 100 commuters na hindi pa bakunado ang pinababa sa mga pampublikong transportasyon sa unang araw ng ‘no vaccination, no ride policy’ ng Department of Transportation (DOTr) sa National Capital Region (NCR) nitong Lunes.
Tulad ng inaasahan, nagpakalat ang pamahalaan ng mga tauhan ng Philippine National Police (PNP), Land Transportation Franchising and Regulatory Board (LTFRB) at Inter-agency Council for Traffic (I-ACT) sa mga pangunahing lansangan sa Metro Manila upang mag-inspeksiyon sa mga PUVs para sa mga ‘di pa bakunadong pasahero.
Sa pagtaya ng I-ACT, mahigit sa 100 unvaccinated passengers ang napababa sa mga PUVs nitong Lunes ng umaga at pinagsabihang magpabakuna muna.
May ilan ding mga drivers ang sinita at pinatigil sa pamamasada matapos na matuklasang hindi pa bakunado ang mga ito o isang dose pa lang ng bakuna ang natatanggap.
Hindi rin muna inisyuhan ng tiket ang mga taong lumabag sa polisiya.
Ang “no vax, no ride” policy ay alinsunod sa direktiba ni Pang. Duterte na limitahan ang galaw ng mga hindi bakunadong indibiduwal sa National Capital Region, upang maprotektahan sila laban sa COVID-19.
Exempted naman ang mga taong may medical conditions na humahadlang sa kanila sa pagpapabakuna at mga unvaccinated people na bibili ng essential goods o mag-a-avail ng services, at maging ang mga patungo sa vaccination sites.
- Latest