4 PNP officials binalasa

MANILA, Philippines — Apat na opisyal ng Philippine National Police (PNP) ang binalasa sa ilalim ng panunungkulan ni PNP Chief General Rommel Francisco Marbil.

Itinalaga ni Marbil si Police Brig Gen. Ronnie Francis Cariaga bilang bagong Director ng PNP Anti-Cybercrime Group (ACG) kapalit niPolice Major Gen. Sidney Hernia.

Inilipat naman si Hernia bilang hepe ng Directorate for Personnel and Records Management (DPRM).

Samantala, itinalaga naman bilang Acting Regional Director ng Police Regional Office (PRO) 11 o Davao Region si Police Brig. Gen. Aligre Martinez kapalit ni Police Brig Gen. Alden Delvo.

Habang si Police Col. Aden Lagradante ang uupo bilang Officer-In-Charge (OIC) ng PNP Command Center sa ilalim ng Directorate for Operations kapalit ni Cariaga.

Nakasaad sa dokumento na epektibo kahapon, Abril 26 ang appointment ng mga nabanggit na opisyal.

Matatandaang sa kaniyang pag-upo sa puwesto, sinabi ni Marbil na hindi siya magpapatupad ng reshuffle sa kanyang mga tauhan maliban na lamang kung hindi nito kayang pamunuan ang yunit o may mabigat na dahilan para gawin ito.

Inaasahan pa ang malawakang balasahan sa mga major post ng PNP sa mga susunod na araw.