Back-to-back sa Junior Altas
MANILA, Philippines — Inilista ng University of Perpetual Help System DALTA ang ikalawang sunod na panalo matapos lusutan ang College of St. Benilde-La Salle Greenhills, 92-88, sa NCAA Season 100 juniors basketball tournament kahapon sa FilOil EcoOil Centre sa San Juan City.
Nagkadena si Jericho Cristino ng 21 points, nine rebounds at two assists para gabayan ang Junior Altas sa pagsuwag sa 2-0 record.
Humakot si 6-foot-7 center Lebron Jhames Daep ng 14 point, 12 boards, 2 steals at 1 assist para ipalasap ang unang kabiguan ng Greenies sa dalawang laro.
Nagdagdag si Jan Roluna ng 16 points, seven rebounds, five steals at one assist, habang may 10 markers, four boards at three assists si Jim Corpuz.
Pinamunuan ni Guillian Quines ang Greenies sa kanyang 22 points, seven rebounds, three assists at five steals.
Samantala, tinalo ng Mapua Red Robins ang back-to-back champions Letran Squires sa overtime, 81-73, para sa magkatulad nilang 1-1 baraha.
Nagpasabog si Ruzzel Del Poso ng 31 points tampok ang siyam na triples para sa unang panalo ng Red Robins.
Tinakasan naman ng Jose Rizal Light Bombers ang Lyceum Junior Pirates, 67-64, para makasampa sa win column.
- Latest
