Belen, Solomon out sa AVC Cup

MANILA, Philippines — Hindi makalalaro sina reigning UAAP MVP Bella Belen at Finals MVP Alyssa Solomon sa AVC Challenge Cup na papalo sa Mayo 22 hanggang 29 sa Rizal Memorial Coliseum.

Kinumpirma ito ni national team head coach Jorge Souza de Brito kung saan may magkaibang dahilan sina Belen at Solomon.

Nais muna ni Belen na pagtuunan ng pansin ang kanyang pag-aaral dahil naghahabol ito sa kanyang OJT bilang Psychology student sa National University.

Nakatakda namang sumailalim sa check up si Solomon sa kanyang iniindang injury.

“They will not join us because they have small injuries they have to recover from and they have to finish class,” ani Souza de Brito.

Naiintindihan ni Souza de Brito ang sitwasyon nina Belen at Solomon lalo pa’t galing ito sa pukpukang laban sa UAAP.

“They also have to rest and celebrate but I’m sure that they want to join but you have to really agree that they have to rest. It would be good if they can join. it would be perfect,” aniya.

Maliban kina Belen at Solomon, hindi na rin makakasama si Casiey Dongallo ng UE dahil sa injury.

Papalitan si Dongallo sa lineup ni Arah Panique ng NU.