Perpetual babangon sa pagkatalo
MANILA, Philippines — Pipilitin ng University of Perpetual Help na makabangon sa una nilang kabiguan sa NCAA Season 99 juniors basketball tournament sa pagharap sa Jose Rizal University.
Sasagupain ng Junior Altas ang Light Bombers ngayong alas-2:30 ng hapon kasunod ang upakan ng Mapua Red Robins at Lyceum Junior Pirates sa alas-4:30 ng hapon sa Filoil EcoOil Arena sa San Juan City.
Sa unang laro sa alas-8 ng umaga magkikita ang San Sebastian Staglets at St. Benilde Junior Blazers habang lalabanan ng nagdedepensang Letran Squires ang Arellano Braves sa alas-10 ng umaga.
Sa alas-12 ng tanghali magtutuos ang San Beda Red Cubs at Emilio Aguinaldo College Brigadiers.
Tabla sa itaas ng team standings ang Perpetual, Letran at Mapua sa magkakatulad nilang 5-1 record kasunod ang San Sebastian (4-3), San Beda (3-3), Jose Rizal (2-4), EAC (2-4), St. Benilde (2-4), Arellano (1-5) at Lyceum (1-5).
Nakalasap ang Junior Altas ng 71-72 kabiguan sa Red Robins, samantalang nagmula ang Light Bombers sa 70-75 pagkatalo sa Junior Blazers.
- Latest
