Ika-17 triple-double inilista ni Jokic

PORTLAND, Ore. — Inilista ni Nikola Jokic ang 29 points, 15 rebounds at 14 assists para sa kanyang ika-17 triple-double sa season sa 127-112 pagdaig ng nagdedepensang Denver Nuggets sa Trail Blazers.

Nagpasabog si Michael Porter ng 34 points para sa Denver (38-19) na nakahugot kay Collin Gillespie ng 18 points tampok ang apat na 3-pointers.

Binanderahan ni Jerami Grant ang Portland (15-40) sa kanyang 25 points habang may 22 at 21 mar­kers sina Deandre Ayton at Anfernee Simons, ayon sa pagkakasunod.

Nang kunin ng Nuggets ang five-point lead sa first period ay hindi na nakalamang ang Bla­zers hanggang sa fourth quarter.

Sa Los Angeles, kumo­lekta si LeBron James ng 30 points, 9 assists at 7 rebounds sa 123-118 pagtakas ng Lakers (31-27) sa San Antonio Spurs (11-40).

Sa Memphis, umiskor si Kawhi Leonard ng 24 points para gabayan ang LA Clippers (37-18) sa 101-95 panalo sa Grizzlies (20-37).

Sa New Orleans, nag­lista si Bam Adebayo ng 24 points at may 23 markers si Jimmy Butler sa 106-95 pagsunog ng Miami Heat (31-25) sa Pelicans (34-23).