Cone nakulangan sa inilaro ng Gilas
MANILA, Philippines — Inilampaso ng Gilas Pilipinas ang Hong Kong, 94-64, sa kanilang unang asignatura sa FIBA Asia Cup Qualifiers 2025.
Bagama’t magandang panalo ito, hindi pa rin kuntento si Gilas PIlipinas head coach Tim Cone lalo pa’t hindi maganda ang simula ng kanyang tropa.
Lumamang ng 11 puntos ang Gilas Pilipinas subalit nakabalik sa porma ang Hong Kong para maidikit ang iskor.
“We didn’t play as well as we hoped. The first half was certainly shaky, just first game jitters, I hope,” sabi ni Cone.
Hawak lamang ng Gilas Pilipinas ang 41-37 kalamangan sa halftime.
Subalit lumabas na ang bangis ng Gilas Pilipinas sa third quarter nang magpasabog ng kaliwa’t kanang atake sa likod ng matikas na laro nina Scottie Thompson at Kai Sotto.
Si Thompason ang nagmando sa plays, habang hawak ni Sotto ang rebounding department.
Nagpasiklab din sina Justin Brownlee, Dwight Ramos at Jamie Malonzo nang ilatag ng tropa ang 30-9 ratsada na naging mitsa para tuluyang patumbahin ang Hong Kong.
“The third quarter was more on what we expected. We were able to create offense off our defense and then our crowd took over and gave us momentum,” ani Cone.
Umaasa si Cone na first game jitters lamang ito at magandang lesson para sa kanilang mga susunod na laban.
Sa naturang laro, nanguna si Brownlee na humakot ng 26 puntos, habang nagdagdag naman si Kevin Quiambao ng 15 markers.
Nakalikom si Sotto ng 13 points at 15 rebounds.
Sunod na haharapin ng Gilas Pilipinas ang Chinese-Taipei bukas sa Philsports Arena sa Pasig City.
- Latest
