MANILA, Philippines — Matapos ang seventh-place finish noong 2018 edition ay nagbalik si Ernest John Obiena sa 19th Asian Games para angkinin ang gold medal sa men’s pole vault kahapon sa Hangzhou, China.
Lumundag ang World No. 2 pole vaulter ng bagong Asiad record na 5.90 meters para ibasura ang dating markang 5.70m ni Seito Yamamoto ng Japan noong 2018 edition sa Palembang, Indonesia.
Ang Asiad gold ng 27-anyos na si Obiena ay may katapat na cash incentive na P2 milyon base sa National Athletes and Coaches Benefits and Incentives Act bukod pa sa pangakong P1 milyong bonus ng Philippine Olympic Committee (POC).
Nagmartsa naman sa finals si long jumper Janry Ubas nang maglista ng 7.79 meters sa Group B preliminaries.
Ang tagumpay ni Obiena ang tumakip sa 62-87 kabiguan ng Gilas Pilipinas sa Jordan sa laban para sa outright quarterfinals berth sa Group C ng men’s basketball.
Sasagupain ng Nationals ni coach Tim Cone ang Qatar para sa tiket sa quarterfinals.
Samantala, swak si Tokyo Olympics silver medalist Carlo Paalam sa quarterfinals sa bisa ng kanyang 4-1 pagdaig kay Munarbek Seiitbek Uulu ng Kyrgyzstan sa men’s 57 kilogram.
Sasalang din sa quarterfinals si Tokyo Olympics bronze medalist Eumir Felix Marcial habang nasibak si Fil-Australian John Marvin sa Round of 16 ng men’s 92kg.
Sa weightlifting, bigo si two-time Asian Junior champion Rosegie Ramos na makausad sa finals ng women’s 49kg category nang tumapos sa fifth place sa itinalang 87kg sa snatch at 103kg sa clean and jerk para sa total lift na 190kg.
Bukas bubuhat si Tokyo Olympics gold medal winner Hidilyn Diaz-Naranjo sa women’s 59kg class.
Sa cycling, papagitna sina Daniel Patrick Caluag at Patrick Coo sa BMX Racing ngayon.