Derozan gumana!
Heat pinalamig ng Bulls
MIAMI — Iniskor ni DeMar DeRozan ang 28 sa kanyang 37 points sa second half, habang nag-ambag si Ayo Dosunmu ng 17 markers sa 116-108 paggiba ng Chicago Bulls sa Heat.
“Not many guys in this league work as hard as I do,” sabi ni DeRozan na tumipa ng average na career-best na 27.9 points sa nakaraang season.
Humakot si Nikola Vucevic ng 15 points at 17 rebounds para sa Chicago at may 12 markers si Goran Dragic.
Binanderahan ni Jimmy Butler ang Miami sa kanyang 24 points at may 23, 22 at 12 markers sina Tyler Herro, Max Strus at Bam Adebayo, ayon sa pagkakasunod.
Sa New York, nagposte si Zion Williamson ng 25 points sa 130-108 dominasyon ng New Orleans Pelicans sa Brooklyn Nets.
Pinamunuan ni Kevin Durant ang Nets sa kanyang 32 points.
Sa Phoenix, isinalpak ni Damion Lee ang isang off-balance jumper para tulungan ang Suns na burahin ang 22-point third-quarter deficit at talunin ang Dallas Mavericks, 107-105.
Kumamada si Devin Booker ng 28 points para pamunuan ang lima pang Phoenix players na umiskor ng double figures.
Sa Salt Lake City, umiskor si Collin Sexton ng 20 points sa 123-102 pagdaig ng Utah Jazz sa Denver Nuggets.
Sa Memphis, nagpasabog si Ja Morant ng 34 points para pamunuan ang Grizzlies sa 115-112 overtime win kontra sa New York Knicks.
- Latest
