WBA belt nadepensahan ni Suarez
MANILA, Philippines — Matagumpay na nadepensahan ni Rio Olympian Charly Suarez ang kanyang World Boxing Association (WBA) Asia superfeatherweight title.
Naitala ng 33-anyos na si Suarez ang unanimous decision win laban sa kababayang si Mark John Yap noong Linggo ng gabi sa Elorde Sports Complex sa Parañaque City.
Nakuha ni Suarez ang boto ng tatlong hurado na nagbigay ng 120-108, 120-108 at 118-110 desisyon para mapanatili ang kanyang WBA belt.
Wala pa ring talo si Suarez sa kanyang professional boxing career para umangat sa 12-0 rekord kabilang ang pitong knockouts habang nahulog si Yap sa 30-17 marka kabilang ang 15 knockouts.
Mainit na sinimulan ni Yap ang laban kung saan nagpakawala ito ng matatalim na suntok na kumunekta kay Suarez.
Kaya naman kinailangan ni Suarez na makabangon nang maglunsad ito ng sariling atake para masugatan ang kanang bahagi ng mata ni Yap.
Mula rito, napanatili ni Suarez ang mataas na intensidad para makuha ang atensiyon ng mga hurado.
“It was a great learning experience for me. This fight taught me how to be patient and be tactical when facing a resilient boxer like Yap,” ani Suarez.
Bago pumasok sa pro boxing, matagumpay ang amateur stint ni Suarez.
Nagbigay ito ng pilak na medalya para sa Pilipinas noong 2014 Asian Games sa Incheon, South Korea habang nakahirit ito ng ginto sa SEA Games noong 2009, 2011 at 2019.
Naging bahagi rin si Suarez ng pambansang delegasyon sa 2016 Olympic Games sa Rio de Janeiro, Brazil subalit hindi ito pinalad na makapasok sa medal round.
- Latest