Global Remit, Manileño sumabit sa semis

MANILA, Philippines — Binuo ng Global Remit at VNS Manileño ang semifinals cast ng Phi­lippine National Volleyball Fe­deration (PNVF) Champions Lea­gue men’s tournament kahapon sa Aquamarine Recreational Center Gym sa Lipa, Batangas.

Tinalo ng Global Remit ang MRT-Negros, 25-21, 25-19, 25-23, para selyuhan ang No. 2 spot sa Pool B at labanan sa semis ang Pool A top-seed na Go For Gold-Air Force na may 2-0 record.

Naglista sina Joeven Dela Vega at Joshua Villanueva ng 12 at 11 points, ayon sa pagkakasunod, para banderahan ang Global Remit.

Nagtabla ang Global Remit (1-2), Sabong International (1-2) at MRT-Neg­ros (1-2) sa No. 2 seat sa Pool B subalit nakamit nila ang huling semis slot dahil sa bentahe sa set ratio.

Kinumpleto naman ng Team Dasma Monarchs ang 3-0 sweep sa Pool B nang dominahin ang Sa­bong International Spikers, 25-20, 25-21, 25-23.

Nauna nang pinatumba ng Team Dasma ang Glo­bal Remit at MRT-Negros.

Humataw si Madzlan Gampong ng 12 points at may 11 markers si Mark Frederick Calado para pa­ngunahan ang Monarchs.

Lalabanan ng Team Dasma sa semis ang VNS Manileño Spikers (1-1) na tinalo ang Basilan Steel Spikers, 25-17, 25-22, 25-23, para pumangalawa sa Pool A.

Maglalaban ang Sabong International, MRT-Negros at Basilan sa classification matches para sa pang-lima hanggang pang-pitong silya simula ngayong umaga.