Inoue-Moloney niluluto?

Casimero out muna

MANILA, Philippines — Malabo nang matuloy sa taong ito ang bakbakan nina World Boxing Organization (WBO) bantamweight champion Johnriel Casimero at super World Boxing Association (WBA)-International Boxing Federation (IBF) bantamweight titlist Naoya Inoue.

Ito ay matapos mapaulat na nakiki­pagnegosasyon na ang kampo ni Inoue sa grupo ni Australian fighter Jason Moloney para sa isang laban na posibleng ganapin sa Setyembre o Oktubre.

Ayon sa ulat, pinaplantsa na lamang ang lahat para tuluyan nang maikasa ang salpukan nina Inoue at Moloney.

Duda ang ilang boxing expert sa panibagong aksyon ni Inoue.

Ilan sa mga sources ang nagsabing posibleng iniiwasan nito si Casimero na pormadung-pormado at handang ilabas ang lahat ng bagsik, maagaw lamang ang koronang hawak ng Japanese pug.

Sinabi pa ng source na mas makabubuting mas magaan na kalaban muna ang makasagupa ni Inoue dahil tila hindi pa nakakarekober ang kanyang katawan sa bugbog na tinamo nang makasagupa nito si Nonito “The Filipino Flash” Donaire noong Nobyembre.

Sa katunayan, naospital pa si Inoue matapos ang laban.

Dahil dito, walang magagawa ang kampo ni Casimero kundi ang humanap ng ibang makakalaban o tuluyan na lamang na bumalik sa Pilipinas ang Pinoy champion habang naghihintay ng pormal na kontrata.

Orihinal sanang maghaharap sina Casimero at Inoue noong Abril sa MGM Grand Garden Arena sa Las Vegas, Nevada.

Subalit naudlot ito dahil  sa coronavirus disease (COVID-19) pandemic kung saan natigil ang lahat ng boxing events maging ang ilang major international competitions.