Warriors rumesbak sa 76ers

PHILADELPHIA -- Na­gawa na lahat ni Stephen Curry sa NBA, kaya nang malagay sa foul trouble at iniskor ang decisive points para tulungan ang Golden State Warriors ay ipinagkibit-balikat niya lamang ito.

“It's interesting, because I think he's still underrated,” sabi ni Warriors teammate Andre Iguodala kay Curry. “I still think he doesn't really get the res­pect he deserves.”

Nagsalpak si Curry ng limang three-pointers para tumapos na may 28 points sa 120-117 pagresbak ng Golden State laban sa Philadelphia.

Naglaro lamang si Curry sa loob ng 3:45 minuto sa third quarter dahil sa pagkakalagay sa foul trouble.

Sa kanyang pagpasok sa fourth period ay nagbagsak si Curry ng 3-pointer para sa 111-109 abante ng Warriors bago ito naitabla ng 76ers.

Iniskor pa ni Curry ang sumunod na anim na puntos ng Golden State sa huling 2:35 minuto para tuluyan nang makalayo sa Phildelphia.

Humataw si Kevin Durant ng 34 points habang may 25 markers si DeMarcus Cousins para tapusin ang two-game road losing skid ng Warriors.

Naglaro naman ang 76ers na wala si franchise star center Joel Embiid sa pang-limang sunod na pagkakataon bunga ng kanyang sore left knee.

Sa Salt Lake City, tumi­pa si Donovan Mitchell ng career-high 46 points para ibangon ang Utah Jazz mula sa 17-point fourth-quarter deficit at kunin ang 115-111 panalo kontra sa Milwaukee Bucks.

Kumamada si Mitchell ng 19 points sa huling 8:10 minuto ng fourth period kabilang ang isang 28-foot jumper sa nalalabing 43.7 segundo para ibigay sa Jazz ang 111-105 bentahe.

Nagposte naman si Giannis Antetokounmpo ng 43 points at 14 rebounds sa panig ng Bucks.

Sa Dallas, naglista si Jonas Valanciunas ng 20 points at 10 rebounds habang umiskor si Joakim Noah ng 12 points para igiya ang Memphis Grizz­lies sa 111-91 panalo sa Mavericks.