Red Lioness, Lady Altas nanalasa
NCAA women’s beach volleyball
MANILA, Philippines — Inilampaso ng nagdedepensang San Beda Red Lioness ang Arellano Lady Chiefs, 21-13, 21-9 upang agawin ang solo liderato sa women’s division ng 94th NCAA Beach Volleyball tournament kahapon sa SM By The Bay sa Pasay City.
Nagpakitang gilas ang Viray twins na sina Maria Jesiela at Maria Nieza upang iangat ang Red Lioness sa malaking panalo sa pamamagitan ng pagpadapa kina Regine Arocha at Necole Ebuen ng Arellano University.
Ito na ang ikalawang sunod panalo ng Red Lioness matapos ang kanilang 21-18, 21-14 panalo laban sa Letran.
At handa nilang sundan pa ito sa pakikipaglaban naman sa Lyceum Lady Pirates habang sinusulat ang istoryang ito.
Ginapi naman nina Deana Estanislao at Dana Persa ng University of Perpetual Help Lady Altas ang koponan ng Lyceum, 21-16, 2-22, 16-14 sa una nilang laro sa torneo.
Sa iba pang laro, nagwagi ang Emilio Aguinaldo Lady Generals kontra sa Arellano, 22-20, 21-9 habang kinaldag din ng College of St. Benilde ang Mapua University, 21-13, 21-15 at nasungkit ng Jose Rizal University Lady Bombers ang 21-16, 21-10 panalo laban sa San Sebastian Lady Stags.
- Latest
