EDITORYAL — ‘Vapedemic’

HINDI lamang ang Department of Health (DOH) ang naaalarma ngayon sa isyu ng e-cigarettes o vape. Pati mga magulang ay nangangamba sapagkat ang kanilang mga anak ay nahuhumaling sa paggamit ng vape. Isa pa rin sa kanilang ikinababahala ay ang pag­­susulputan ng vape shops malapit sa eskuwelahan.

Isang grupo ng mga magulang na tinawag na Parents Against Vape (PAV) ang umaapela sa pamahalaan na magkaroon nang mahigpit na kautusan laban sa pagbebenta sa vape products. Ayon sa PAV, nakaalarma ang pagkahumaling ng mga kabataan sa vape at tinawag nila itong “vapedemic”.

Ayon pa sa grupo, kinakailangan nang amyendahan ang Vape Law at itigil na rin ang pagpo-promote sa vape products upang hindi mahikayat ang mga kabataan.

Marami na umano ang naglabasang flavor ng vape na isang paraan para maakit ang mga kabataan na tikman ito. Ayon pa sa PAV ang vape ay hindi ligtas na alternatibo sa paninigarilyo. Mapanganib sa kalusu­gan ang vaping na sumisira sa lungs at utak ng mga kabataan. Nakamamatay ang bisyong ito gaya ng ni­report ng EVALI or e-cigarette or vaping use-associated lung injury.

Nararapat suportahan ang panawagan ng mga ma­gulang laban sa panganib ng vaping. Delikado ito sa kalusugan. May mga naitala ng report na namatay dahil sa vape. Gaya nang nangyari sa isang 16-anyos na babae sa Visayas noong 2018. Nakuha niya ang sakit sapagkat ang mga kasamahan niya sa bahay ay gumagamit ng vape.

Nakadagdag sa pagkahumaling ng mga kabataan sa vape ay sapagkat madaling makabili nito. Laganap ang vape store sa bisinidad ng school. Paglabas ng mga estudyante, sa vape store ang tungo nila.

Noong nakaraang taon nangako ang Philippine National Police (PNP) sa Department of Health (DOH) na babantayan ang vape shops na nagbebenta sa menor-de-edad pero hindi ito tinupad. Dumaraan lang ang mga pulis sa harap ng vape shops na parang walang nakita.

Kamakailan, ipinangako ni Finance Secretary Ralph Recto, na ipapanukala niya ang pagbabawal ng lahat ng uri ng mga disposable vape products sa Pilipinas. Ayon kay Recto, karamihan sa disposable vapes na ipinagbibili sa bansa ay hindi rehistrado sa Department of Trade and Industry (DTI). Hindi rin umano nag­babayad ng excise taxes ang mga ito.

Ayon sa DOH lahat nang vape products ay mapa­nganib sa kalusugan. Ang disposable vapes ay gawa sa plastic at batteries at nagtataglay ng harmful che­micals na kapag nalanghap ay delikado sa baga. May sangkap itong nicotine, propylene glycol, carbonyls at carbon monoxide na harmful sa baga.

Suportahan ang mga magulang laban sa vape. Iligtas ang kabataan sa bisyong ito bago mahuli ang lahat.