EDITORYAL - Voter registration dapat palawigin

Pinag-iisipan pa umano ng Commission on Elections (Comelec) kung i-extend ang voter registration na ang deadline ay sa darating na Huwebes (Setyembre 30). Kung matutuloy, maaaring magkaroon umano ng dalawang linggong extension ang voter registration.

Bakit dalawang linggo lang? Bakit hindi gawing Oktubre 31 ang deadline. Araw-araw ay mahaba ang pila sa Comelec offices dahil sa dami nang nagpaparehistro para makaboto sa May 2022 elections. Karamihan sa mga nagpaparehistro ay bagong botante.

Ayon sa Philippine Statistics Authority (PSA), tinatayang 73.3 milyon ang kuwalipikadong ma-kaboto subalit ang nakarehistro pa lamang ay tinatayang 60 milyon. Marami pa kung ganun ang hindi nakakarehistro – 13.3 milyon. Sayang naman kung hindi makakaboto ang mga ito dahil lamang hindi makaaabot sa deadline ng registration.

Kung dalawang linggo lang ang papayagang extension, imposibleng makarehistro ang 13.3 milyong botante. Kahit pa mag-extend ng oras para sa registration hindi pa rin kakayanin na marehistro lahat. May limitasyon din naman ang Comelec sa tinatanggap na magrerehistro. Kaya ang mga nakapila, hindi rin sila sigurado kung makakarehistro. Marami naman ang nag-o-online appointment para makarehistro subalit nagda-down naman internet kaya sa pagpila pa rin sila bumabagsak. Ang iba nagba-backout na dahil natatakot magtagal sa pila at baka mahawa ng COVID.

Naapektuhan ng lockdown ang voter registration. Isinailalim sa enhanced community quarantine (ECQ) ang NCR at maraming lugar noong Agosto 6-31 at modified enhanced community quarantine (MECQ) noong Setyembre 1-7. Sa loob ng panahong ito, suspendido ang voter registration. Kasalanan ba ng mga magrerehistro kung bakit hindi sila nakapagpatala? Dapat nakita ng Comelec ang problema at nakapag-adjust sila at may plano para sa extension ng registration.

Sabi ng Comelec kakapusin sila sa oras sa paghahanda sa 2022 elections kung magkakaroon nang mahabang extension. Sabi ni Comelec spokesperson Jimenez, napakahirap daw maghanda sa election kung patuloy na gagalaw ang bilang ng registered voters.

Pagbigyan ang kahilingan na ma-extend ang registration at gawin itong isang buwan. Sayang kung hindi makakaboto ang first time voters. Dapat marinig ang kanilang boses sa darating na election.