China binalaan na ng Amerika
MALINAW na nagkamali si dating senador Juan Ponce Enrile na malabong asahan ang United States na tutulong sa atin kung sumiklab ang madugong sagupaan ng Pilipinas at China kaugnay ng usapin sa West Philippine Sea.
“Don’t count on the United States to give arms support to the Philippines, even in its current maritime dispute with China,” ani Enrile sa kanyang pakikipag-usap kay Presidente Duterte kamakailan.
Nirerespeto ko ang pahayag ng isang taong dinalubhasa ng matagal na karanasan. Pero sa puntong ito, malaki ang pagkakamali ng kanyang teorya. Bakit? Kasi, binalaan na ng United States ang China sa ginagawa nitong pagpapakita ng pangil sa pamamagitan ng pagsaklaw sa bahagi ng karagatang mayroon tayong exclusive economic rights.
Tama si Enrile na dapat daanin sa diplomasya ang pagresolba sa usaping ito, hangga’t maaari. Pero hindi puwedeng isaisantabi lagi ang solusyong militar kung talagang hindi maawat ang China sa ginagawang intrusion nito sa mga lugar na may karapatan tayo.
Pero hindi lang diplomasya ang ipinaiiral ng administrasyon kundi pagsusuko ng ating karapatan at pagkampi sa China, lalo na nang sabihin mismo ng Presidente na ang buong pinagtatalunang karapatan ay pag-aari na ng China.
Binalaan ng US ang China sa mga agresibong hakbang tulad ng pagdedeploy ng mga sasakyang pandagat at panduduro sa mga Pilipino at ibang dayuhan mangingisda. Tinukoy ni State Department Spokesman Ned Price ang Military Defense Treaty ng Pilipinas at Amerika na nagsasabing magtutulungan ang dalawang bansa sa panahon ng digmaan.
Huwag nating kalimutan na tutulong ang Amerika hindi lamang dahil sa tratado kundi dahil may interest ito sa pagpapanatili ng balance of power sa rehiyon na maaaring kumiling sa China kapag di naagapan.
- Latest
