SUV driver, todas sa road rage sa Makati

MANILA, Philippines — Patay ang driver ng isang SUV nang barilin ng nakaalitan sa trapiko sa Makati City nitong Martes ng hapon.

Sa sketchy report mula kay P/Major Anthony Bagsik, commander ng Ayala Police Sub-station, dakong alas-2:30 ng hapon kahapon nang maganap ang insidente ng pamamaril malapit sa Ayala southbound tunnel, sa Barangay  Urdaneta, Makati City.

Inilarawan ang nasawi sa edad na  45-50 anyos na nagmaneho ng isang itim na Toyota Innova na may plakang NCV-5421.

Hindi pa tukoy ang kalibre ng baril na ginamit sa krimen ng gunman na nagmamaneho umano ng Sedan.

Batay sa nakasaksi, ang biktima at suspek ay kapwa bumabagtas sa Kalayaan Flyover  southbound patungo ng EDSA southbound  ng Brgy. Urdaneta nang magkaroon ng ‘di pagkakaunawaan na nauwi sa pamamaril ng suspek.

Patuloy na iniimbestigahan ng pulisya ang insidente kabilang ang pagtukoy sa plaka ng sasakyan ng suspek upang matunton at maaresto.

Dahil sa insidente, nagdulot ng paninikip sa daloy ng trapiko pansamantalang pagsasara ng Ayala tunnel.