Cessna plane bumagsak: Piloto, 1 pa sugatan
MANILA, Philippines — Isang piloto at isang pasahero na hindi pa pinangalanan ng awtoridad ang kapwa sugatan nang bumagsak ang kanilang sinasakyang 4-seater Cessna 172 plane na may body number RP-C6923 sa San Fernando City, La Union kahapon ng umaga,
Ayon sa Philippine Coast Guard (PCG), alas-9 ng umaga nang maganap ang light plane crash sa katubigang bahagi ng Barangay Canaoay sa San Fernando City.
Lumalabas na umalis ang eroplano sa San Fernando Airport sa San Fernando City, ilang minuto lang bago ang aksidente.
Agad na nag-deploy ang Coast Guard District Northwestern Luzon ng Coast Guard Medical-NWLZN at Special Operations Unit-NWLZN upang rumesponde sa insidente.
Nang marating ang lugar, agad na nagbigay ng first aid ang medical team ng Philippine Coast Guard, kasama ang San Fernando City Disaster Risk Reduction Management Office, sa dalawang biktima at agad na isinugod sa Lorma Medical Center.
Tinawagan din ang Marine Environmental Protection Unit sa lugar upang maglatag ng dalawang 25-metrong oil spill booms upang mapigil ang posibilidad ng oil spill sa lugar na mula sa eroplano.
Nagsasagawa na ng imbestigasyon ang Civil Aviation Authority of the Philippines (CAAP) sa sanhi ng pagbagsak ng eroplano.
- Latest