Mga buto ng tao nakuha sa septic tank

MANILA, Philippines — Palaisipan sa mga pulis ang pagkakadiskubre sa mga buto ng tao sa septic tank ng isang bahay sa Doña Aurora, Quezon City.

Ayon kay PSSg Dhonnie B. Peralta ng Quezon City Police District Criminal Investigation and Detection Unit (QCPD-CIDU), natagpuan ang naturang mga buto bandang alas- 8:30 ng umaga kahapon sa Serrano Laktaw St., Brgy. Doña Aurora, Que­zon City.

Nagulat si John Christoper Guda nang mga buto ng tao ang kanyang  natanggal na bumabara sa septic tank.

Agad niyang ipinagbigay alam sa barangay ang insidente.

Sinabi naman ng QCPD-CIDU na kinukunan na rin nila ng pahayag ang nakatira sa nasabing bahay, gayundin ang may-ari nito.

Isasailalim din sa DNA tests ang mga buto.