Aberya sa VCM, agad na naremedyuhan
MANILA, Philippines - Sa kasagsagan ng botohan ilang Vote Counting Machine (VCM) ang nagkaaber-ya sa ilang polling precinct sa lungsod ng Pasay, Muntinlupa, Makati at isa namang flying voter ang nadakip sa Parañaque City kahapon ng umaga.
Sa area ng Pasay City, ayon sa report na natanggap ni Sr. Supt. Joel Doria, hepe ng Pasay City Police, alas-7:35 ng umaga nang magka-aberya ang VCM sa Cuneta Elementary School na matatagpuan sa Park Avenue Barangay 75, Zone 10 ng nasabing lungsod.
Kaagad namang ini-report sa Commission on Election (COMELEC) ang nagkaa-beryang VCM, na nasa precinct 75 at makalipas ang dalawang oras ay napalitan naman ito. Bandang alas-10:00 na ng umaga nang muling buksan ang presinto sa mga botante.
Ayon kay Doria, nasa 821 na mga pulis ang nakakalat sa buong lungsod at katuwang nila ang 54 miyembro ng Armed Forces of the Philippines (AFP) na nagbibigay ng seguridad at todo bantay sa mga polling precinct.
Nabatid, na 75 inmates na pawang kalalakihan at 16 kababaihang inmates ang bumuto sa loob ng Pasay City Jail (PCJ).
Sa area naman ng Muntinlupa City, alas-6:40 ng umaga ay nagkaaberya din ang VCM sa may Muntinlupa National High School, Brgy. Poblacion ng naturang lungsod.
Hindi nabasa ng VCM ang binoto ng apat na botante at halos anim na oras na-delay ang botohan sa naturang polling precinct.
Alas-12:35 ng tanghali muling itinuloy ang botohan sa naturang paaralan.
Sa 11 polling precinct, isa lamang dito ang nagkaroon ng aberya at ito ay sa area ng Muntinlupa National High School. Napag-alaman na 1,887 preso ng New Bilibid Prison (NBP) sa naturang lungsod ang bumoto kahapon.
Samantala, sa lungsod ng Parañaque, isang babaeng flying voter ang dinakip sa Brgy. Don Bosco ng naturang siyudad.
Sa area naman ng Makati City, nagkaroon din ng aberya ang ilang VCM sa ilang polling precinct at naasar ang ilang botante dahil nawawala ang kanilang mga pangalan.
Nagkaroon ng aberya ang VCM sa ilang polling precinct sa San Lorenzo Village at nawawala naman ang pangalan ng ilang botante sa Maximo Estrella Elementary School.
Kinulang naman ang ballot secrecy folder para sa mga senior citizens at PWDs sa Pio Del Pilar high School, na ikinaasar ng mga botante.
- Latest
