MANILA, Philippines – Nakatakdang kasuhan ng mga awtoridad ang limang suspek na nadakip na pinaniniwalaang nasa likod ng walang habas na pamamaril sa lungsod ng Quezon nitong Linggo.
Sinabi ni Senior Inspector Maricar Taqueban, Quezon City Police District Public Information Office head na tanging si Alsaid Mindalano lamang ang makakasuhan ng multiple murder para sa pagpatay sa pitong katao sa North Fairview.
Ang 28-anyos na si Mindalano ang nagmamaneho at may-ari ng motor na ginamit sa pamamaril, ayon pa kay Taqueban.
Kasong illegal possession of firearms and ammunition, possession of illegal drugs at direct assault naman ang isasampa laban kina Bochary Mindalano, 32; Mangoatawar Monib, 31; Ahmad Madkadato, 18; at sa isang 16-anyos na suspek.
Ibibigay ng mga pulis sa Department of Social Welfare and Development ang menor-de-edad.