Tag-ulan dineklara na ng PAGASA

MANILA, Philippines — Pormal nang idineklara ng PAGASA ang pagsisimula ng panahon ng tag-ulan sa bansa.

Ayon sa weather bureau, ang kalat-kalat na pag-ulan, mga thunderstorms at ang pagpasok ng bagyong Aghon gayundin ng Southwest Monsoon (Habagat) sa nakalipas na araw ang nagdala ng mga pag-uulan sa western sections ng Luzon at Visayas na nagpapakita ng pagsisimula ng rainy season.

Inihayag din ng PAGASA ang mataas na tsansa ng pagpasok ng La Niña sa Hulyo, Agosto at Setyembre na sa pagkakataong ito ay inaasahan ang mas maraming ulan kaysa sa normal na nararanasang pag-ulan sa panahon ng tag-ulan hanggang sa pagtatapos ng 2024.

Samantala, may mararanasan ding monsoon breaks sa panahong ito.

Nagpaalala ang PAGASA na palagiang maghanda at magsagawa ng precautionary measures upang maibsan ang impact ng rainy season, habagat at ang pagpasok ng La Niña na magdudulot ng mga pagbaha at pagguho ng lupa dahil sa pag-uulan.