AFP ‘di naghahanda sa giyera sa Balikatan war drills

MANILA, Philippines — Hindi naghahanda sa giyera ang Armed Forces of the Philippines (AFP) kaugnay ng isasagawang Balikatan joint military drills 2024 sa pagitan ng tropa ng Pilipinas at Estados Unidos.

“War is off the table. The Philippines has no plan to engage in any form of conflict,” paglilinaw ni National Security Council (NSC) Assistant Director Jonathan Malaya matapos sabihin ni Col. Michael Logico sa round table discussion sa mga miyembro ng Foreign Correspondents of the Philippines (FOCAP) na ang Phl-US Balikatan joint military exercises 2024 ay bilang paghahanda sa giyera.

Kaugnay nito, nagpahayag naman ng pagkadismaya at nagbabala ang mga opisyal ng China sa deployment ng Medium Range Ballistic Missile sa Northern Luzon na gagamitin sa military drill doon.

Tiniyak naman ni Malaya na ang Balikatan joint military drills na gaganapin mula Abril 22 hanggang Mayo 10 ay nakapokus lamang sa pagpapalakas ng kapabilidad sa depensa ng Pilipinas gayundin sa interoperatibility at kooperasyon sa pagitan ng dalawang magkaalyadong puwersa.

Nabatid pa na ang Mid-Range Capability Missile System (MRCS) ng US Army ay dumating na sa isang lokasyon sa hilagang Luzon bilang bahagi ng Exercise Salaknib 2024.

Ito na ang pinakamalaking war games na isasagawa ng Pilipinas at US forces na nakatakda namang obserbahan ng nasa 14 pang mga kaalyadong bansa na kinabibilangan ng Brunei, Canada, France, Germany, Great Britain, India, Indonesia, Japan, Malaysia, New Zealand, Republic of Korea, Singapore, Thailand at Vietnam.