Quiboloy sinubpoena ng Senado, Kamara
MANILA, Philippines — Nagpalabas na ng subpoena ang Senado at Kamara laban sa pinuno ng Kingdom of Jesus Christ (KOJC) na si Apollo Quiboloy.
Inihayag ni Sen. Risa Hontiveros ang pagpapalabas ng subpoena sa pagpapatuloy ng imbestigasyon ng Senado sa mga akusasyon laban kay Quiboloy na kinabibilangan ng large-scale human trafficking, rape, sexual abuse at violence, at child abuse sa loob ng kanyang religious group.
Ang subpoena ad testificandum ay inihanda noong Pebrero 14 at nilagdaan ni Senate President Juan Miguel Zubiri nitong Lunes ng madaling araw.
“Yes, the subpoena against Apollo Quiboloy is out. Gaano man kalakas ang ingay ng politika, mas malakas ang panawagan para sa katarungan,” ani Hontiveros.
Matatandaan na hindi sinipot ni Quiboloy ang unang pagdinig ng Senate committee on women, children, family relations, at gender equality sa umano’y harassment sa loob ng KOJC.
Sa Kamara ay nag-isyu rin kahapon ng subpoena ang panel ng Kamara laban kay Quiboloy.
Ito’y kaugnay ng patuloy na pang-iisnab ni Quiboloy na dumalo sa pagdinig ng House Committee on Legislative Franchises kaugnay naman ng paglabag sa prangkisa ng Sonshine Media Network International (SMNI).
Si Quiboloy, nahaharap rin sa sex trafficking sa Estados Unidos ang itinuturong honorary chairman ng SMNI.
Base sa nilagdaang subpoena, pinadadalo si Quiboloy sa darating na Marso 12, 2024 sa Kamara.
Nangangahulugan ang contempt na makakalaboso sa detention facility ng Kamara si Quiboloy kapag nabigo itong dumalo sa pagdinig.
Nauna nang sinabi ni Quiboloy na haharapin lamang niya ang mga alegasyon laban sa kanya sa harap ng korte.
Sa pagdinig, sinabi ni Bureau of Immigration (BI) Legal Division chief Arvin Cesar Santos na walang records ng pag-alis ni Quiboloy ng Pilipinas.
Ang huling flight ni Quiboloy ay noong dumating sa bansa noong Hulyo 22, 2023.
Ayon kay Senior State Counsel Mary Grace Quintana, maaari nang maglabas ang Department of Justice ng immigration lookout bulletin order (ILBO) para kay Quiboloy dahil sa isinasagawang imbestigasyon sa Senado.
- Latest
