Makabayan Bloc sinisisi sa pagkamatay ng mga kabataang recruit ng NPA

MANILA, Philippines — Sinisisi ni National Youth Commission (NYC) chairman Undersecretary Ronald Gian Carlo Cardema ang Makabayan Bloc sa umano’y pagkamatay ng mga kabataang na-recruit ng New People’s Army (NPA) at isinalang sa mga combat operations.

Sa virtual press conference ng Integrated Communications Office Center (ICOC), ang media bureau ng National Task Force to End Local Communist Armed Conflict (NTF-ELCAC) pinamumunuan ni Director Joel Sy Egco, sinabi ni Cardema na ang Makabayan Bloc na kinabibilangan ni ACT partylist Repz France Castro, ang umano’y responsable sa mga namatay na mga ­estudyante at mga out-of-school youths na nalinlang ng NPA.

Batay aniya ito sa mga intelligence report ng AFP at PNP.

Ipinaalala pa ni Cardema na isiniwalat sa House plenary hearing ng kanyang kapatid na si Duterte Youth partylist Rep. Dixie Mae Cardema, ang pagkamatay ng halos 50 kabataan sa mga engkwentro ng NPA sa tropa ng pamahalaan.

Hinamon ng kanyang kapatid sina Castro at dalawa pang miyembro ng Makabayan Bloc na Gabriela at Kabataan partylist na magkomento sa video ngunit nagsawalang kibo lang umano ang mga ito.