Kawalan ng ambisyon ng mga kabataang Pinoy, bubusisiin ng Senado

MANILA, Philippines — Pinabubusisi ni Senador Sonny Angara ang mga ulat na nawawalan na ng ambisyon sa buhay ang karamihan ng mga kabataang Filipino.

Sa inihaing Senate Resolution no. 226 ni Angara, layon nito na tututukan ang usapin ng kawalan ng mga pisikal na aktibidad at ambisyon ng mga kabataan.

Matatandaan na naglabas ng pag-aaral ang World Health Organization (WHO) noong 2019 na apat sa lima, o 81% ng mga Pinoy edad 11 hanggang 17 ay wala ng mga physical activities.

Giit ng senador, ang Pilipinas ang isa sa nangunguna sa listahan kaya nakakaalarma ito na dapat na agad aksyunan at tugunan ang naturang problema.

Paliwanag pa ni Angara na base rin sa pag-aaral ng The Dream Project PH, na walo sa 10 Filipino teenagers ay wala nang ambisyon o pangarap sa buhay sa mga dahilan na kawalan ng oras na mapag-usapan ang ambisyon o pangarap ng isang bata.

Gayundin ang kawalan ng role model ng mga kabataan, limitadong motibasyon mula sa komunidad, limitadong pagkakataon upang makapag-aral at kahirapan sa buhay.