MANILA, Philippines — Nakapagtala ang Department of Health ng 13,827 bagong infection ng coronavirus disease (COVID-19), Martes, kung kaya't nasa 1,989,857 na sumatutal ang nahahawaan nito sa bansa.
Batay sa mga bagong nakalap na datos ng Kagawaran ng Kalusugan, narito ang bagong mga pasok na datos para araw na ito:
- Lahat ng kaso: 1,989,857
- Nagpapagaling pa: 145,562, o 7.3% ng total infections
- Kagagaling lang: 16,759, dahilan para maging 1,810,847 na lahat ng gumagaling
- Kamamatay lang: 118, na siyang nag-aakyat sa total local death toll sa 33,448
'Delta' bilang dominanteng variant
-
Kinumpirma ng World Health Organization na ang lubhang nakahahawang Delta variant na ang pangunahing dahilan ng transission ng COVID-19 sa Pilipinas.
-
Pinaalalahanan naman ng DOH ang lahat na bawal pa rin magpabakuna laban sa COVID-19 ang mga bata at menor de edad sa Pilipinas. Ito'y matapos makumpirma ang balitang naturukan ng vaccine ang ilang 17-anyos na may comorbidity sa Tacloban.
-
Nasa 76.29% naman na ng P311 milyong halaga ng special risk allowance ang na-disburse sa mga manggagawang pangkalusugan sa gitna ng COVID-19 pandemic. Ito'y matapos ang kaliwa't kanang protesta ngayon ng healthcare workers na nagrereklamo sa kawalan at maliliit na benepisyo sa gitna ng peligro.
-
Umabot naman na sa 13.78 milyon ang nakakukuha na ng kumpletong dose ng COVID-19 vaccines sa Pilipinas, ayon sa pinakahuling datos na inilabas ng DOH ngayong araw.
-
Sa kabila niyan, tanging 2,684 pa lang ng kabuuang 48,000 preso ng Bureau of Corrections ang nabibigyan ng mga naturang bakuna. Ito'y kahit na siksikan ang mga naturang kulungan.
-
Kahit na nagkakaproblema pa sa suplay ng COVID-19 vaccines at kapraso pa lang ng populasyon ang natuturukan nito sa Pilipinas, inilahad ni Foreign Affairs Secretary Teodoro Locsin na magdo-donate ang bansa ng mga naturang gamot sa Myanmar.
-
Umabot na sa 216.3 milyon ang tinatamaan ng COVID-19 sa buong daigdig, ayon sa huling datos ng WHO. Sa bilang na 'yan, patay na ang 4.49 milyong katao.
— James Relativo