OFWs, tindero sa palengke, media atbp. susunod na tuturukan vs COVID-19
MANILA, Philippines — Pormal nang inaprubahan na ng Inter-Agency Task Force on Emerging Infectious Diseases ang mga susunod na prayoridad ng gobyerno na mabakunahan laban sa coronavirus disease (COVID-19), bagay na pasok na sa "Priority Group A4" ng National COVID-19 Vaccine Deployment Plan.
Ayon kay Health Undersecretary Maria Rosario Vergeire, ilan sa isinang-alang-alang ng gobyerno sa pagtatalaga sa susunod na priority listing ang pagiging "essential workers" ng mga nabanggit, maliban sa pakikisalamuha sa maraming tao.
"They are directly interacting with [many] people. Pangalawa [nariyan] 'yung contribution nila sa economics natin... hindi pwedeng mawala sila at maitigil muna ang trabaho nila. Tuluy-tuloy sila kahit may pandemya," ani Vergeire, Biyernes.
"'Yung mga saleslady, mga cashier, nasa commuter transport sector [atbp.]"
Una nang sinabi ng National Economic and Development Authority (NEDA) na posibleng sa Mayo o Hunyo na matuturukan laban sa COVID-19 ang mga nabanggit na sektor.
Sinu-sino na sila?
Narito ang kumpletong listahan ng mga A4 sectors batay sa inaprubahan nitong Huwebes:
- commuter transport (land, air, and sea), kasama ang logistics
- nagtratrabaho sa palengke
- nagtratrabaho sa groceries, supermarkets at delivery services
- manggagawa sa pagmamanupaktura ng pagkain, inumin at gamot
- nagtratrabaho sa food retail kasama ang food service delivery
- frontline workers sa pribado at pampublikong financial services
- nagtratrabaho sa hotel
- mga pari, rabbi, imam atbp. lider relihiyoso
- gwardya sa mga tanggapan na nasa listahan ng priority industries/sectors
- nagtratrabaho sa media
- kawani ng mga kumpanyang telecoms, cable at internet service providers, electricity distribution at water distribution utilities na direktang humaharap sa tao
- frontline personnel sa paaralan
- overseas Filipino workers, kasama ang mga ide-deploy pa lang sa susunod na dalawang buwan
- nagtratrabaho sa law/justice, security, at social protection sectors
- frontline government workers na nasa operasyon ng transport system, quarantine inspection
- nasa worker safety inspection at ibang COVID-19 response activities
- nasa gobyerno para asikasuhin ang buwis, assessment ng mga negosyo para sa insentibo, eleksyon national ID at kawani sa data collection
- diplomatic community and Department of Foreign Affairs (DFA) personnel sa consular operations
- kawani ng Department of Public Works and Highways na trabahong mag-monitor ng government infrastructure projects
MECQ tuloy sa Quirino
Samantala, mananatili naman sa ilalim ng modified enhanced community quarantine ang mga lugar na nasa loob ng probinsya ng Quirino hanggang ika-30 ng Abril batay na rin sa peligro ng COVID-19.
Tuluy-tuloy naman ang pag-eensyado ng mga atleta ng Pilipinas sa Olympic Training Bubble sa Calamba, Laguna at pagpapalawig ng pansamantalang pagbabawal sa mga banyaga hanggang katapusan ng buwan.
"[Only] foreign nationals with valid entry exemption documents duly issued by the DFA prior to March 22, 2021 will be allowed entry to the Philippines," patuloy ng IATF.
- Latest
