GCQ sa Metro Manila hanggang Oktubre 31, hirit
Para mas ‘merry’ ang Christmas
MANILA, Philippines — Para mas maging “merry” ang Christmas, hinikayat ng ilang eksperto ang gobyerno na panatilihin sa ilalim ng general community quarantine (GCQ) ang Metro Manila hanggang Oktubre 31.
Ayon kay Dr. Tony Leachon, dating adviser ng pandemic task force ng gobyerno, ang bilang ng mga taong infected ng coronavirus ay nasa .82 sa buong bansa at .73 sa Metro.
Ang nasabing bilang ay mas mababa sa ideal na bilang 1 kaya nangangahulugan ito na ang virus ay malapit nang mawala, bagama’t mataas pa rin ang bilang ng mga nagpopositibo dito.
Sa datos ng Department of Health (DOH), umaabot sa 3,000 kada araw ang bagong kaso ng COVID-19.
Paliwanag pa ni Leachon na magiging problema sa pagdiriwang ng Pasko ang pagdami ng mga sasakyan at maraming tao ang mamamasyal kaya ngayon pa lang ay mas maganda na i-control ito.
Para habang nagsasaya ang tao sa Kapaskuhan ay mayroon ng “sandbag” na tinatawag at mailatag na ito ngayon.
Kung luluwagan na umano ngayon ang quarantine at papayagan ang mga aktibidad na may kinalaman sa ekonomiya at biglang maglabasan ang mga Filipino ay tiyak umanong tataas ang kaso ng COVID-19 at aabot ito hanggang sa panahon ng Pasko.
Bukod kay Leachon, pabor din ang mga Metro Mayors na sumailalim muna sa GCQ ang MM hanggang Oktubre 31 gayundin si Dr. Benjie Co at ang UP OCTA Research Group.
Habang isinusulat ito, nakikipagpulong na ang mga Metro mayors sa Inter-Agency Task Force kaugnay ng kanilang rekomendasyon na GCQ sa Metro Manila.
- Latest