137 na-'food poison' sa 90th birthday ni Imelda — Philippine Red Cross

MANILA, Philippines (UPDATE 2 2:24 p.m.)— Isinugod sa ospital ang ilang indibidwal matapos diumano malason kasunod ng pagdiriwang ng ika-90 kaarawan ni dating first lady Imelda Marcos.

Ayon sa ulat ng Philippine Red Cross, umabot sa 137 katao ang nakaranas ng pagsusuka at panghihilo mula sa 2,000 na dumalo sa birthday.

Kinumpirma naman ni Bebot Diaz, chief-of-staff ni Marcos, na nasa mabuting kalagayan ang dating unang ginang, sabi sa ulat ng DWIZ.

Nasa tatlong indibidwal na rin daw ang inilipat sa Rizal Medical Center habang tinitignan na ang presyon ng dugo ng 25 iba pa.

Umabot na rin sa walong ambulansya ang ipinadala kasunod ng nangyari.

Eight PRC ambulances responded to an alleged food poisoning in a private celebration at the Ynares Sports Complex at 11:20 this high noon, July 3. According to reports, an estimated 2,000 participants were present in which at least 137 individuals suffered vomiting and dizziness. pic.twitter.com/cgsuj2iySr

— Philippine Red Cross (@philredcross) July 3, 2019

Kinumpirma na rin ni PRC chair at senador na si Sen. Richard Gordon ang nangyari.

"PRC medic teams are currently responding to an alleged food poisoning incident at the Birthday Celebration of Ms. Imelda Marcos at Ynares Sports Complex this morning,"  wika ni Gordon.

(Kasalukuyang tumutugon ang PRC medic teams sa diumano'y food poisoning na nangyari sa kaarawan ni Gng. Imelda Marcos sa Ynares Sports Complex ngayong umaga.)

Maglalabas pa naman daw ng karagdagang detalye patungkol sa nangyari.

Sa ulat naman ng News5, sinabing sumama ang pakiramdam ng mga bisita matapos makakain ng inihaing adobo.

WATCH | Nasa 137 na mga dumalo sa ika-90 na kaarawan ni dating First Lady Imelda Marcos sa Ynares Sports Center, Pasig ang isinugod sa ospital matapos makaramdam ng pagsusuka at panghihilo nang makakain ng handang adobo. @onenewsph @News5AKSYON pic.twitter.com/eoYiTZnwp3

— Marianne Enriquez (@mariannenriquez) July 3, 2019

Ipinagdiwang ni Imelda Marcos, na asawa ng dating diktador na si Ferdinand Marcos, ang kanyang birthday kahapon, ika-2 ng Hulyo.

Kasalukuyan namang nanunungkulan bilang bagong halal na senadora ang kanyang anak na si Imee Marcos. — may mga ulat mula sa News5