Napoles pinalilipat na sa Correctional

MANILA, Philippines — Ipinalilipat na sa Correctional Institution for Women ng Sandiganbayan First Division si ‘pork barrel scam queen’ Janet Lim Napoles matapos mahatulang guilty sa kasong plunder.

“I hereby commit to you the person Janet Lim Napoles, sentenced by this Court per Decision promulgated on December 7, 2018,” saad ng utos ng korte.

Inilabas ang utos matapos na ibasura ang kahili­ngan ni Napoles na hayaan at manatili na lamang siya sa kaniyang detention cell sa Camp Bagong Diwa sa Taguig City.

Si Napoles at ang dating aide ni dating Sen. Bong Revilla na si Atty. Richard Cambe ay kapwa hinatulan ng reclusion perpetua o habambuhay na pagkakabilanggo.

Nakalaya naman si Revilla matapos mapawalang sala sa naturang kaso na may kaugnayan sa maling paggamit ng P224 milyong Presidential Assistance Development Fund (PDAF) mula sa mga pekeng non-government organizations project ni Napoles.

Nauna nang nakulong si Napoles sa Correctional matapos itong mapatunayang guilty sa kasong illegal detention.

Gayunman, pinawalang sala ng Korte Suprema si Napoles kaya inilipat ito sa Camp Bagong Diwa habang dinidinig ang kasong pork barrel scam.

Naghain naman ng motion for reconsideration si Napoles sa desisyon ng korte na iginiit na kung napawalang sala si Revilla ay dapat ganito rin ang maging desisyon sa kanyang kaso.

Samantala, nagpadala naman ng formal notice si Cambe sa Sandiganbayan na sinabing iaapela niya ang desisyon sa Mataas na Hukuman.