Paglaban sa droga, tuloy - Duterte

Hanggang sa kahuli-hulihan na ‘tulak’ 

MANILA, Philippines - Siniguro kahapon ni Pangulong Rodrigo Duterte sa kanyang unang State of the Nation Address (SONA) na hindi titigil ang kanyang gob­yerno habang mayroong natitirang drug pusher.

Inatasan ni Pangulong Duterte ang Philippine National Police at local government officials na huwag titigil habang mayroong natitirang drug user, drug pusher na patuloy sa kanilang illegal drug activities.

“There will be no let up in this campaign. Double your efforts, triple them if need be. We will not stop until the last drug lord, last financer and last pusher have surrendered or put behind bars or below the ground if they so wish,” wika pa ni Pangulong Duterte.

Bago pa man maupo sa puwesto si Pangulong Duterte noong June 30 ay sinimulan na ng PNP ang kanilang anti-drug operations.

Mula July 1, umabot sa 3,213 drug perso­nalities ang naaresto sa buong bansa habang nasa 239 drug suspects naman ang napatay sa anti-drug operations.

Umabot naman sa 120,038 volunta­rily  surrenders sa gobyerno kung saan ay 112,902 drug users at 7,107 naman ang pushers.

Siniguro rin ni Duterte sa mga awtoridad na nasa likod nila ang Office of the President pero huwag nilang aabusuhin ang kanilang pagiging awtoridad dahil siya ang numero unong magiging kalaban nila.

“Abuse your authority and there will be hell to pay for you will become worse than criminality itself,” dagdag pa ni Duterte.

“In this quest, I will put at stake my honor, my life and the presidency itself. I repeat. Do not do drugs because you willl be the solution to the drug crisis that has engulfed the nation.”