Rider patay, angkas sugatan sa bangga
MANILA, Philippines – Isang motorcycle rider ang nasawi habang sugatan ang kanyang angkas nang aksidenteng bumangga ang kanilang sinasakyang motorsiklo sa plant box sa Pasig City, kahapon ng madaling araw.
Matinding pinsala sa ulo ang ikinamatay ng biktimang si Edmon Adigue, 36, ng Blk.1 Lot 24, Horacio De La Costa Homes, Brgy. Barangka, Marikina City na dead-on-arrival sa pagamutan.
Samantala, kasalukuyang naka-confine sa The Medical City ang back rider nito na nakilalang si Ma. Theresa Perez, 29, ng Pamayanang Diego Silang, Taguig City.
Sa inisyal na imbestigasyon ng Pasig City Police Traffic Division, naganap ang insidente dakong alas-2:45 ng madaling araw sa C-5 Road Fly-over Brgy. Ugong Pasig City.
Sakay ng isang Yamaha FZ 135cc motorcycle na may plakang 2933-MW ang dalawa at bumibyahe sa lugar nang aksidenteng bumangga sila sa isang plant box.
Sa lakas ng impact nang pagkakabangga ay halos lumipad ang biktima at nabagok sa sementadong kalsada na naging dahilan nang agarang pagkamatay nito.
- Latest
