2-araw na tigil-pasada ikinakasa ulit ng PISTON

MANILA, Philippines — Ikakasa muli ng transport group na Pinagkaisang Samahan ng mga Tsuper at Opereytors Nationwide (PISTON) ang dalawang araw na tigil-pasada sa susunod na linggo.

Sa isinagawang kilos protesta kahapon ng umaga sa tapat ng Korte Suprema, kinumpirma ng grupo na plano nilang maglunsad muli ng panibagong tigil-pasada sa Abril 29, Lunes, at 30, Martes, sakaling hindi dinggin ang kanilang mga hinaing laban sa isinusulong na Public Uti­lity Vehicle Modernization Program (PUVMP) ng pamahalaan.

Ayon sa grupo, ang naturang kilos-protesta ay lalahukan ng tinatayang aabot sa 250,000 miyembro ng PISTON sa buong bansa.

Matatandaang noong Abril 15 at 16 ay una na ring nagkasa ng tigil-pasada ang mga grupong PISTON at Manibela bunsod ng nalalapit nang pagtatapos ng April 30 consolidation deadline, na unang bahagi ng PUVMP.

Kahapon ay kina­lampag ng PISTON ang Korte Sup­rema at hini­ling na aksiyunan na nito ang kanilang petisyon na humihiling ng temporary restraining order (TRO) laban sa modernization program.