Bilang ng mga pamilyang naniniwalang sila ay mahirap, bumaba - survey

MANILA, Philippines — Batay sa resulta ng pinakahuling OCTA Research survey sa unang quarter ng 2024 ay buma­ba ang bilang ng mga Pilipinong nakaranas ng gutom at kahirapan.

Sa naturang survey, lumalabas na 42% o tinata­yang 11.1 milyong pamilya sa bansa ang itinuturing na mahirap sa unang quarter ng tao.

Mas mababa ito kum­para sa 45% o katumbas ng 11.9 milyong Pilipino na nagsabing sila ay mahirap noong ika-apat na quarter ng 2023.

Ayon sa OCTA, nagpapakita rin ito ng tuluy-tuloy na downward trend sa self-rated poverty na nasa 50% noong Hulyo ng 2023.

Malaki ang ibinaba ng self-rated poverty sa Metro Manila na bumaba sa 29% mula sa 40%; mula rin sa 46% ay bumaba sa 28% ang self-rated poverty sa Balance Luzon; habang nasa 47% naman sa Visayas.

Bumaba rin sa 11% o katumbas ng 2.9 milyong pamilya ang nakaranas ng involuntary hunger sa unang quarter ng 2024.

Mas mababa rin ito ng 3% kumpara sa 14% self-rated hunger rate noong huling quarter ng 2023.

Kabilang naman sa mga rehiyong may pagbaba ng self-rated hunger ang Visayas at Mindanao.

Isinagawa ang Tugon ng Masa survey mula March 11-14 sa 1,200 respondents nationwide.