Mga residente ng Benguet aayudahan ng cash at bigas
MANILA, Philippines — Aayudahan ng cash at bigas ng pamahalaan ang mga residente ng Benguet sa Linggo.
Pangungunahan ni House Speaker Martin Romualdez ang cash and rice distribution o card program ng pamahalaan sa Benguet na ika-20 lalawigan na bibigyan ng ayuda ng gobyerno para sa mga mahihirap na kababayan.
Ayon kay House Speaker Romualdez, tinutupad lang ng Pangulong Marcos ang pangako na prayoridad sa kanyang administrasyon ang mga mahihirap na sabay-sabay na aahon at hindi sila maiiwan.
“Ang kongreso ay naglaan ng malaking halaga para sa programang ito at tuloy-tuloy ito sa ilalim ng kasalukuyang administrasyon,” ani speaker Romualdez.
Tiniyak pa ni Romualdez na lahat ng lalawigan sa bansa ay dadaanan ng ayuda program ng pamahalaan na ang layon ay para makaagapay ang mga maliliit na kababayan natin sa mga gastusin at pagkain sa araw-araw.
Para naman kay Benguet Lone District Cong. Eric Yap, ang pagdala ng ayuda ni Romualdez ay natiyempo kung saan ay nararanasan ang matinding El Niño sa lugar.
Pinasalamatan din ni Cong. Yap ang Pangulong Marcos at si Speaker Romualdez sa ayuda na ibababa sa kanyang distrito.
- Latest
