Lyceum sumabit sa liderato
MANILA, Philippines — Nakisalo sa tuktok ng team standings ang Lyceum of the Philippines matapos silang akbayan ni veteran outside hitter Johna Dolorito sa 25-15, 22-25, 25-11, 27-25 panalo kontra sa Arellano University sa NCAA Season 99 women’s volleyball tournament na nilaro sa FilOil EcoOil Centre kahapon.
Bumira ang third year na si Dolorito ng 20 points mula sa 18 attacks at dalawang service aces upang manatiling malinis sa tatlong laro ang Intramuros-based squad at saluhan sa top spot ang defending champions College of Saint Benilde Lady Blazers.
Pahirapan ang panalo ng Lady Pirates, dumaan sa butas ng karayom dahil ipinaramdam din ng Lady Chiefs ang kanilang lakas lalo na sa set four kung saan ay muntik silang makahirit ng deciding fifth set.
Mabuti na lamang at naging matatag ang mga kakampi ni Dolorito na sina Joan Doguna at Janeth Tulang.
Sinabayan nina Dolorito, Doguna at Tulang ang matikas na laro ni Pauline De Guzman at Robbie Matawaran, binasag ng Lady Pirates ang mahigpit na depensa ng Lady Chiefs.
Tumikada si Doguna ng 16 points at 11 digs habang nag-ambag si Tulang ng 14 markers para sa LPU na ipinalasap sa Lady Chiefs ang pangalawang talo sa tatlong salang.
Tumipa rin si rookie middle blocker Heart Bio ng 11points para sa LPU.
Hindi nakapaglaro para sa Arellano ang pambato nilang si team captain Dodee Batindaan kaya kina De Guzman at Moming Padillon kumapit ang koponan.
- Latest
