MANILA, Philippines — Dahil sa forced outage ng 19 na power plants ay isinailalim sa Red at Yellow alert ang Luzon grid kahapon ng hapon.
Sa abiso ng National Grid Corporation of the Philippines (NGCP) sinimulang ipatupad ang Red alert status mula 2 ng hapon hanggang alas-4:00 ng hapon at alas-6:00 ng gabi hanggang alas-9:00 ng gabi.
Ang Red alert status ay inilalabas kapag ang suplay ng kuryente ay hindi sapat at upang matugunan ang pangangailangan ng mga consumer at ang mga kinakailangan sa pagkontrol ng transmission grid.
Ipapatupad naman ang Yellow alert status mula ala-1:00 ng hapon hanggang alas-2:00 ng hapon, alas-4:00 ng hapon hanggang alas-6:00 ng gabi at alas-9:00 ng gabi hanggang alas-11:00 ng gabi.
Ang Yellow alert ay ibinibigay kapag ang operating margin ay hindi sapat upang matugunan ang mga kinakailangan sa contingency ng transmission grid.
May 12 power plant naman ang nasa forced outage, habang ang 5 iba pa ay tumatakbo sa derated capacities, sa kabuuang 676.5MW na hindi available sa grid.