Grade 10 na nagbibisekleta bumangga sa poste, todas

MANILA, Philippines — Idineklarang dead on arrival sa ospital ang isang lalaking Grade 10 student matapos bumangga sa poste habang nagbibisekleta sa isang palusong na kalsada sa San Mateo, Rizal, kamakalawa.

Kinilala ang nasawi na si Shawn Harvy Salvador, 16, Grade 10 student, dahil sa matinding pinsala sa ulo.

Sa ulat ng San Mateo Municipal Police Station, alas-7:00 ng umaga nang maganap ang aksidente sa palusong na bahagi ng Siko Timberland, Brgy. Guitnang Bayan 1, San Mateo.

Sa salaysay sa pulisya ng ina ng biktima na si Maricel, nabatid na bago ang aksidente ay sakay ng isang mountain bike ang biktima.

Gayunman, pagsapit sa palusong na bahagi ng kalsada ay nawalan umano ng kontrol sa bisikleta ang biktima at bumangga sa poste.