SUV driver na nanagasa ng sekyu, ’di sumipot sa piskalya
MANILA, Philippines — Kung dati ay hindi sinipot ng SUV driver na si Jose Antonio Sanvicente ang hearing ng Land Transportation Office (LTO) ay ganito rin ang kanyang ginawa nang hindi siputin kahapon ang preliminary investigation ng City Prosecutor’s Office ng Mandaluyong City sa kasong frustrated murder at abandonment of one’s own victim kaugnay ng pagsagasa sa guardiyang si Christian Floralde sa Mandaluyong City, kamakailan.
Sinabi ng abogado ni Sanvicente na si Atty. Danny Macalino, na hindi kailangang magpakita ng kanyang kliyente sa proceedings dahil hindi pa niya naisusumite ang kanyang counter-affidavit.
Inihayag naman ni Atty. Federico Biolena, abogado ng biktimang si Christian Joseph Floralde, ang pagkadismaya sa hindi pagsipot ni Sanvicente sa preliminary investigation.
“Medyo disappointed, pero may hustisya naman tayo,” pahayag ni Biolena.
Ayon kay Biolena, isinumite ni Floralde ang kanyang sworn statement sa piskalya at inaasahan namang isusumite ni Sanvicente ang kanyang counter-affidavit sa susunod na preliminary investigation sa Hunyo 23.
- Latest