Rider nag-overtake sa trak, utas
MANILA, Philippines — Hindi na umabot ng buhay ang isang motorcycle rider nang magulungan ng isang trailer truck na kanyang siningitan at lagpasan kamakalawa ng gabi sa Caloocan City.
Ang biktimang nasawi ay nakilalang si Ronald Agravante, 35, may-asawa at nakatira sa No. 1104 Orchid Street, Sitio Gitna Kaybiga, Caloocan City.
Dinakip naman ang truck driver na si Steven Jimmy Balanquit, Jr., 30, ng GSIS Hills Subd., Talipapa, Novaliches, Quezon City.
Lumalabas sa imbestigasyon na bago nangyari ang insidente dakong alas-6:30 ng gabi sa C3 Road malapit sa Dagat-Dagatan Avenue, Brgy. 22, ng lungsod ay kapwa binabagtas ng motorsiklo ng biktima at trailer truck (UWJ-481) ang lugar.
Papaliko na sa kanan ang trak nang tangkain ng biktima na lagpasan ito kahit umano alanganin na naging dahilan para mawalan ng kontrol at sumampa sa bangketa.
Bumagsak ang biktima at hindi napansin ng driver ng truck dahil nasa “blind spot” hanggang sa nagulungan ang biktima at makaladkad.
Nadala pa sa Philippine Orthopedic Center sa Quezon City ang biktima ngunit idineklarang wala nang buhay dakong alas-8:42 ng gabi.
- Latest
