Lemon Bell kinalembang ang Group race

MANILA, Philippines — Nakasikwat ng panalo ang Lemon Bell sa PHILRACOM Group Based On Time (16) Race na nilarga sa Metro Turf, Malvar - Tanauan City, Batangas noong Martes ng gabi.

Humarurot sa unahan ang Lemon Bell habang sinundan agad ito ng Make A Difference at Petron nasa malayong kulelat naman ang Sinag.

Sa kalagitnaan ng karera ay nakakapit ang Make A Difference at Petron sa Lemon Bell pero hindi nagpatinag sa unahan ang winning horse.

Papunta ng far turn ay ang Make A Difference na lamang ang bumubuliglig sa Lemon Bell habang nauupos sa tersero ang Petron.

Subalit sa huling kurbada ay umungos na ng todo ang Lemon Bell sa Make A Difference at hindi na ito pinaporma sa rektahan.

Sinakyan ni jockey Jerico Serrano, tinawid ng Lemon Bell ang meta ng may apat na kabayo ang agwat sa pumangalawang Make A Difference.

Nilista ng Lemon Bell ang tiyempong 1:27.6 sa 1,400 meter race sapat upang hamigin ng winning horse owner ang P5,000 added prize habang P3,000 ang kinubra ng breeder ng nanalong kabayo.

Dumating na pangatlo ang Sinag at pang-apat ang Petron sa event na suportado ng Philippine Racing Commission, (PHILRACOM).