Ghost, Guce nanilat sa 1st Leg Triple Crown
MANILA, Philippines — Ginulat dehadong Ghost ang mga karerista matapos angkinin ang panalo sa 2024 PHILRACOM “1st Leg Triple Crown Stakes Race” na nilarga sa Metro Turf, Malvar - Tanauan City, Batangas noong Linggo ng gabi.
Pinakahuli sa largahan ang Ghost na sinakyan ni reigning Philippine Sportswriters Association, (PSA) - Jockey of the Year awardee John Alvin Guce habang nagbabanatan sa unahan ang Worshipful Master at Bea Bell.
Nasa hulihan pa rin ang Ghost pagdating sa kalagitnaan ng karera habang nakihalo na ang Batang Manda sa unahan sa Worshipful Master at Bea Bell.
Papalapit sa far turn ay bumabandera pa rin ang Worshipful Master habang hirap na makalampas ang Batang Manda, Bea Bell at Added Haha.
Pagsapit ng huling kurbada ay lumarga pa sa unahan ang Worshipful Master ng tatlong kabayo habang pilit na kumakapit ang Batang Manda at Bea Bell.
Sa huling 150 metro ng karera sa rektahan ay tinawag na ng race caller si Ghost na nasa bandang labas pero nasa tatlong kabayo pa rin ang bentahe ni Worshipful Master.
Natiyagaan ni Guce ang pagremate ng Ghost, malalakas na palo ng latigo ang pinatama ng hinete sa kabayo kaya naman sakto ang dating nila sa finish line.
Sa nguso lang nagkatalo ang Ghost at ang pumangalawang Bea Bell, tersero ang Batang Manda habang pang-apat ang Worshipful Master.
Nilista ng Ghost ang tiyempong 1:42 minuto sa 1,600 meter race sapat upang hamigin ang tumataginting na P1.5M premyo habang napunta ang P562,500 sa pumangalawang Bea Bell.
- Latest