Bakbakan sa semis lalarga ngayon
MANILA, Philippines — Matira matibay sa huling apat na koponan ng 2024 PBA Philippine Cup semifinals simula ngayong Game 1 sa Mall of Asia Arena.
Magkakaiba man ng landas na tinahak, wala nang buwelo-buwelo para sa reigning champion San Miguel, crowd favorite Ginebra, darkhorse Meralco at gatecrasher na Rain or Shine sa pag-arangkada ng kanilang best-of-seven semifinal series.
Bubuksan ito ng No. 1 seed na Beermen kontra sa No. 5 na Elasto Painters sa alas-4:30 ng hapon habang sabong ang magkaribal na segundang Gin Kings at terserang Bolts sa alas-7:30 ng gabi.
Panibagong semis entry ito ng SMB at Ginebra bilang dalawa sa top contenders sa nakalipas na dekada habang pagbabalik naman ito sa Final Four ng Meralco at lalo na ang independent team na Rain or Shine.
At lumusot sa butas ng karayom ang Elasto Painters upang maisakatuparan ito matapos umeskapo kontra sa paboritong Talk ‘N Text Tropang Giga sa best-of-three quarterfinals.
Unang yumukod ang RoS sa Game 1, 116-99, bago umiskor ng dalawang sunod na panalo para sa matinding comeback win. Pinakamalupit dito ang pambihirang 110-109 pagtakas sa Game 3.
Maging ang primerang Beermen na halos winalis ang elims hawak ang 10-1 kartada ay kinailangang ibuhos ang buong puwersa kontra sa No. 8 subalit palabang Terrafirma.
Nasilat ang SMB sa Game 1 upang muntikang malustay ang twice-to-beat advantage subalit nakabawi sa knockout Game 2, 110-91.
- Latest
